Zenodia and Qunnie 去街街

近呢一兩年工作都比較繁忙，我地兩個都少左帶o的寶貝落街玩。
難得我今日放假，加上今日天氣都唔錯。
所以就帶左qunni同zenodia兩隻小朋友去街街~~

 

呢兩隻小鬼好相親相愛，落到街佢地要一齊行。
是但一隻落後，另一隻就會望向後面等理先肯一齊行。
diadia反而一聽到少少聲就蛇咬都唔肯郁，一定要傑拖佢先肯行。
qunni就好乖無扭計，不過佢就行得好慢~
傑同dia dia跑到老遠...qunni都依然好有儀態繼續慢慢行...哈哈

 

其實今日都幾大風，我地都驚會冷親呢兩隻小鬼。
但見Zenodia已經肥到豬仔咁既身型，就應該真係比佢出去跑下減下肥先~
放繩比佢地係清水灣半島個到跑都無問題，
不過放放下就開始好多狗主黎放狗~

 

當然，小鬼都會有爭寵既時候。qunni唔抵得人地摸dia dia，
佢就放個頭係人地隻手到...要人地摸佢而唔比人摸dia dia~
衰豬.....你乖都要比人讚下其他小朋友乖家嘛~

至於Zenodia，佢係一隻野孩子~哈哈~亦係一隻好多表情既腸腸，
佢最鐘意就係扮"半獸人"嚇我地~點解咁講呢~
事關早輪同傑再睇返魔戒，見到好多半獸人都係好衰相。
而dia dia就係成日都會整個衰相出黎望住你令你發笑~~

來自台灣既dia dia，都唔記得係我地第幾多隻腸腸。
但佢性格的確係比qunni活潑得多，
至少佢見到其他狗主拋波波，眼見人地隻狗追得咁開心佢又會想追埋一份。

呢隻小朋友最叻係扮死反轉個肚任你摸，
有時係屋企見佢訓到反曬肚，佢知你摸佢肚仔，
佢只會怒睥你一眼，之後就唔郁家啦......衰豬~

 

 

不論邊隻小朋友都好，都係我地既活寶貝。
有時候放工返到屋企好累，只要見到佢地就已經開心曬。
佢地要求既野唔多，除左一個良好既生活環境，食物同水之外。
可能你錫下佢地，摸下佢地，同佢地傾下偈佢地就會知感覺到有人重視佢。

兩隻豬仔返到屋企已經累到圈住一齊訓覺。
我都係時候要抖抖啦~哈哈~