蒙羅麗Ter的微笑

尋日大黑小朋友都搵都好主人，唔覺唔覺又無左一隻小朋友....
唔捨得的確係有，因為大黑小朋友對水汪汪既眼睛成日都會呆住咁望住我...
但難得佢搵到好主人，同埋搵到個女朋友。其實都係一件開心既事。

之後我同傑就帶左Terry去清水灣半島個邊行左一陣，
呢隻衰仔......曬到死個陣就唔肯行.......
去到o的陰涼位置就行到彈下彈下......
不過正當太陽烈日當空既時候....
terry又真係熱到變"熱狗"咁呢......

人人都以為佢係女仔，但其實佢係女生男相。
不過terry都好乖，佢係成日比lucas蝦既一隻....
你抱佢佢唔會郁，反而任你摸任你抱。
嘻嘻，抱住佢訓覺簡直一流~

傑成日都話terry正面個樣好咸濕，但我認為有時佢都幾可愛~
就以下面呢兩張相咁，我一見到就比左個名佢，
呢兩張相就叫做"蒙羅麗ter的微笑" 哈哈~~殺食呢~!!

以下呢幾張相係不得不介紹，點解呢~等你地睇完我先開估~!!

 

可能Terry係日本都係用石屎地...其次係佢好累....
最大既碌地原因係......佢唔鐘意條狗繩，所以佢要係個地下到碌黎碌去，
希望扮死有人會"可憐"佢，可以放佢一馬。
不過我地試過放繩Terry係會變左一個跑狗.........
與其我地兩隻腳點跑都唔夠佢四隻腳咁快...........都係唔好博啦.....

愛上臘腸，除左係佢地肥大既"水魚"手之外，
亦係因為佢地好多古惑既表情。
你好明顯係會睇得出地開心既一面。

我反而覺得Terry正面雖然係咸濕左d，不過其實佢都幾英家!!

以下呢張我又係不得不介紹~~哈哈~
本身係Terry追住傑跑，但佢跑得太快，我對焦唔到，
不過就影到呢張我好鐘意既相。

呢一張又係好奇怪既一張合照，
一個全身著黑色衫既人抱住一隻全身黑色既狗。
哈哈，做咩兩個都咁"黑"既~

從來我唔知點先為之一隻"骨架精奇"既臘腸狗~
因為我希望每一隻小鬼都可以開開心心咁生活。
傑成日都會覺得，有能力既話就應該比小鬼最好。
事關佢地既健康同快樂係係我地手上，
如果我地忽視佢地既健康同需要，
對佢地黎講係一種好差好差既待遇。

或者有時好似Terry咁，傻下傻下，
做下熱狗通山走都幾好~
所以平時放工返到屋企就算幾累，
只要見到佢地向你搖頭擺尾，之後牛咁眼望住你，
就算佢地幾嘈都好，你都會覺得係開心既。

呼~~其實仲有好多Terry既相post唔到出黎，
因為唔可以放太多係個blog到，
唯有就係是但揀左o的出黎比大家睇。
夜啦...又係時候要訓覺，各位早抖~